Mnamo Mei 1, Ubalozi wa China nchini Tanzania uliandaa hafla ya ufunguzi wa Maonesho ya Teknolojia ya Juu ya “Experience China” katika Kituo cha Biashara na Usafirishaji cha Afrika Mashariki. Balozi wa China nchini Tanzania, Chen Mingjian, Waziri wa Mawasiliano na Teknolojia ya Habari wa Tanzania, Angellah Jasmine Mbelwa Kairuki, Kamishna Jenerali wa Uhamiaji, Dkt. Anna P. Makakala, wajumbe wa Jumuiya ya Mabalozi nchini Tanzania pamoja na zaidi ya watu 200 kutoka sekta mbalimbali walihudhuria hafla hiyo na kutembelea maonesho hayo.

Katika maelezo yake, Balozi Chen alisema kuwa teknolojia za kisasa za China katika maeneo kama vile mawasiliano na teknolojia ya habari, serikali ya kidijitali, sayansi na teknolojia ya kilimo, nishati safi, na teknolojia ya anga zimeimarisha ushirikiano kati ya China na Tanzania na kuchangia maendeleo ya kiuchumi ya Tanzania. China iko tayari kushirikiana na Tanzania kuimarisha mawasiliano na ushirikiano, kushirikishana mafanikio ya ubunifu, na kuendeleza ujenzi wa jumuiya ya karibu zaidi ya China na Tanzania yenye mustakabali wa pamoja.

Waziri Kairuki alisifu mafanikio ya China katika maendeleo ya teknolojia za kisasa, akibainisha kuwa teknolojia zilizoonyeshwa katika tukio hilo zinaendana kwa karibu na Mfumo wa Mkakati wa Uchumi wa Kidijitali wa Tanzania wa 2024–2034. Alitoa wito wa kuimarishwa kwa ushirikiano wa kiteknolojia kati ya China na Tanzania kwa ajili ya maendeleo ya pamoja.

Bidhaa nyingi za Kichina za teknolojia ya juu zilizooneshwa kwenye maonesho hayo tayari zimetumika nchini Tanzania. Maonesho hayo yalikuwa wazi kwa umma hadi tarehe 10 Mei.